अस्तित्व…
Written by Dr Subhash Katakdound
अस्तित्व कसं दिव्यामधल्या
ज्योतीप्रमाणे असतं
किती तेल शिल्लक राहिले
ते त्याला माहित नसतं
अस्तित्वाला कसं मनाच्या
कानोस्यात सुरक्षित वाटतं
कधी अचानक साध्या हवेच्या
झुळूकीने ही ते बुझतं
अस्तित्व तनाच्या देव्हाऱ्यात
आनंदाने उजळतं
जिवलगांच्या आयुष्यात
ते प्रेमानं प्रकाशतं
अस्तित्व कसं दिव्यामधल्या
ज्योतीप्रमाणे असतं
साथ देणाऱ्या वातीला
विरहात सोडून जातं
अस्तित्व कसं दिव्यामधल्या
ज्योतीप्रमाणे असतं
पार्थिवाजवळ आत्म्याच्या
रूपाने ते तेवतं
अस्तित्व कसं आठवणी
मागे सोडून विझतं
काजळीच्या खुणांनी
दिव्याभोवती चिकटतं
विझलेल्या दिव्याच दूःख
काही काळच टिकतं
नव्या ज्योतीनं नव अस्तित्व
पुन्हा जन्माला येतं
Written by Dr Subhash Katakdound
Khopoli – 9561284408
Date – 5th September 2017